NJUJORK, Kompanija Gugl je započela svoju odbranu od konzorcijuma Rokstar koji čine Majkrosoft i Epl uz tvrdnje kako Android ne krši patente.
Naime, Rokstar tvrdi da operativni sistem Android krši nekoliko patenata na koje polažu prava, a osim Gugla u tužbi se nalazi i sedam kompanijinih partnera, uključujući Samsung i HTC.
Gugl sada tvrdi kako Android uređaji ne krše niti jedan od patenata koji su predmet tužbe, a od suda traže potvrdu ove tvrdnje. Osim toga, okomili su se i na samu svrhu postojanja ovog konzorcija – kažu kako Rokstar ima tim inženjera koji istražuje uspješne proizvode na tržištu i mogućnosti koje bi mogli da pripišu svojim patentima.
Rokstar je 2011. kupio patente Nortela za 4,5 milijardi dolara. U nadmetanju za kupovinu učestvovao je i Gugl ali su oni odustali i naknadno kupili Motorolu Mobiliti, prenose agencije.
