ATINA, Vođa grčkog radikalnog lijevog bloka Syriza Aleksis Cipras optužio je njemačku kancelarku Angelu Merkel da “igra poker sa životima Evropljana” kada insistira na strogim mjerama štednje.
Predviđa se da će Syriza na ponovljenim izborima 17. juna osvojiti najveći broj glasova Grka, a žele pokrenuti nove pregovore i o kreditima koje je država dobila od MMF-a i EU.
Cipras je za Bi-Bi-Si rekao da će se, ako “bolest štednje uništi Grčku, proširiti i na druge dijelove Evrope”. On tvrdi da banke zarađuju na građanima Evrope koje su ostavili u siromaštvu.
“Evropsko vođstvo, a pogotovo kancelarka Merkel, moraju prestati igrati poker sa ljudskim životima”, rekao je Cipras.
Izbori u Grčkoj ponovo će biti održani 17. juna, najavio je danas predsjednik Državnog savjeta i predsjednik Vrhovnog upravnog suda Panajotis Pikramenos, koji je imenovan za tehničkog premijera privremene prelazne vlade, javila je grčka novinska agencija ANA.
Pikramenos je dodao da će pripreme obaviti privremena prelazna vlada.
Ovo će biti drugi put da Grci za nešto više od mjesec dana izlaze na birališta nakon što su 6. maja održani vanredni parlamentarni izbori i poslije niza neuspjelih pokušaja da se forimara nova koaliciona vlada.
Portparol predsjednika Karolosa Papuljasa juče je saopštio da su posljednji pokušaji formiranja vlade doživjeli neuspjeh i da će biti sazvani novi izbori, a da će u međuvremenu biti formirana prelazna vlada.
Lideri tri grčke vodeće partije nisu uspjeli da postignu dogovor ni o sastavu tehničke vlade koja će vodi Grčku do izbora u junu, pa je prema grčkom Ustavu u tom slučaju predsjednik države dužan da imenuje tehničkog premijera iz redova predsjednika tri glavna suda – Vrhovnog upravnog suda, Vrhovnog građanskog suda i Vrhovnog krivičnog suda, odnosno Sud revizora, navodi ANA.